حكاية النسناس وكلام الناس _____☆☆_____ بقلم / مرقص إقلاديوس

حكاية النسناس و كلام الناس
(حكاية كوميدية بالمحكية المصرية)
بقلم..مرقص إقلاديوس
.......
ليه الواحد أول ما بيفرح بينسى ناسه.
وأول ما بيحزن اول من بيجري عليهم ناسه.
 ....
.....
نسناس و نسناسة خلفوا, هيجيبوا ايه يعني.
ما لازم الصغير يطلع نسناس عشان يبقى شبه ناسه.
.....
كبر النسناس
قال يلف الدنيا يتفرج على العالم و ناسه.
لف كتير
و بعدين ناس ..ولاد حلال طبعا..
قالوله زي ما البر فيه ناسه , البحر فيه ناسه.
إنت بس اشترى زعنفتين ونضارة
و إنزل اتفرج على البحر وناسه.
....
النسناس ما كدبش خبر.
غطس النسناس....فطس النسناس.
....
الناس هما هماهم..ولاد الحلال اياهم.
 بقوا يخبطوا كف على كف.
 و يقولوا مجنون عبيط. يستاهل اللي جراله.
عمرنا ما قرينا فى الكتب . و لا سمعنا في الحكايات.
إن نسناس اشتغل غطاس.
............
                  ملاح بحور الحكمة..مرقص إقلاديوس
                يكتب لكم هذا التقرير من جنازة النسناس
     و إللى يخليك تجنن إنك تعرف. إن المشيعين هم الناس اياهم .